Сенбілік концерт бағдарламасы стандартты емес сахналық конфигурацияда, нақтырақ айтқанда — көрермен мен музыканттар бір қатысу алаңына ортақтасатын сахнасыз ашық дөңгелек кеңістікте өтеді. Концерт Джон Кейдж, Йоко Оно, Нам Джун Пайк және ХХ ғасыр авангардының басқа да маңызды тұлғаларымен әріптес болып, музыка өнерінде жаңа бағыт қалыптастырған беделді жапон композиторы және концептуалды музыканың аты аңызға айналған өкілі Миеко Сиоми пьесасының үшінші және соңғы рет орындалуынан басталады. Оның «Жел және көлеңке салтанаты» туындысы — Триеннале үшін арнайы жазылған дыбыстық перформанс-эксперимент. Бұл жолы пьесаны дәстүрлі музыкант, күйші, ұлттық музыка танушы және Құрманғазы атындағы Қазақ ұлттық консерваториясының оқытушысы Ермек Қазмұхамбет пен театр саласында білім алған және халықаралық заманауи театр сахнасында өнер көрсетуден айтарлықтай тәжірибесі бар башқұртстандық заманауи өнерпаз және перформанс әртісі Зилиә Қансұра орындайды. Триеннале аясында тағы бір премьера — экспериментал музыкант Айрат Хазиев (Şüräle) пен екі индонезиялық әртіс: экстремалды жанрлар вокалисі Карина Утомо және явандық гамелана аспабын зерттеуші Билава Аде Респатидің бірлескен перформансының арнайы алдын ала көрсетілімі өтеді. Трио өздеріне ортақ идея — аруақтар рухына арналған концептуалды дыбыстық пьесамен жұмыс істеуде. Туындының толық нұсқасы кейінірек — осы жылы Берлинде электронды және экспериментал музыканың әлемдік маңызды форумдарының бірі — СТМ фестивалі барысында көрсетіледі. Бұл алдын ала көрсетілім — жұмыстың іс жүзінде жасалу барысына куә болуға таптырмас мүмкіндік. Төртінші эпизод бағдарламасын атауы айтып тұрғандай ерекше ұжымдық перформанс — «Сыбыр хоры» аяқтайды. Бұл — палестиналық әртіс Бинт Мбәрех пен атауы өзін айқындап тұрған «Impossible Territories» зерттеу платформасының бірлескен жұмысының нәтижесі. Билава Аде Респатидің өнер көрсетуіне Қазақстандағы Гете-Институт қолдау білдіреді.